December 4, 2008 - Posted by Erla Sylvía - 2 Comments
Rakst á
þessa síðu á netinu og miðað við að ég breyti ekki út af þessum lífstíl sem ég fylgi núna þá:
- er minn líffræðilegi aldur 24 ár (verst að ákveðnir líkamshlutar skuli ekki vera í “24 ára forminu” ennþá …)
- get ég áætlað að lifa þar til ég verð 96,9 ára (og það þrátt fyrir að hafa fengið krabba - merkilegt)
- hef ég (með þessum lífstíl) bætt 19,5 árum við ævi mína (og ef ég laga nokkur atriði í viðbót get ég bætt þetta um 2 ár!)
Ég held það hafi allir gott af því að taka svona próf til þess að sjá hvar þeir standa … og ef niðurstaðan er ekki eins og best verður á kosið þá er alltaf hægt að gera eitthvað til þess að bæta ástandið 
November 16, 2008 - Posted by Erla Sylvía - 2 Comments
Elva systir eignaðist stelpu seinnipartinn í dag eftir þónokkur átök. Við Jonni fórum til þeirra upp í Hreiður áðan og kíktum á litlu fjölskylduna. Litla dúllan var 15,5 merkur og 51 cm með ljósar krullur og bollukinnar. Hérna er mynd af henni nokkurra tíma gamalli.
November 14, 2008 - Posted by Erla Sylvía - 3 Comments
Jæja, ég var víst búin að lofa að láta heyra í mér þegar niðurstöður úr sneiðmyndatöku og blóðprufum kæmu. Ég fór sem sagt í blóðprufur í síðustu viku og í sneiðmyndtökuna í gær. Læknirinn hringdi svo í mig áðan og tilkynnti mér að þetta liti allt saman mjög vel út. Enga blöðru var að sjá vinstra megin og sú á hægri eggjastokk var búin að minnka allverulega. Öll gildi í blóðprufum voru eðlileg fyrir utan járnið sem er of lágt. Ég er auðvitað í skýjunum yfir þessu, er á leiðinni út í búð að kaupa mér járn en skortur á því gæti skýrt af hverju ég er búin að vera svona hrikalega þreytt undanfarið. Svo þarf líklega að fylgjast með skjaldkirtlinum líka, virðist stefna í vanvirkni þar þannig að ég er bara að kanna hvað ég get gert til þess að hægja á því ferli.
Góða helgi!
November 11, 2008 - Posted by Erla Sylvía - 1 Comment
… eða þannig
Ég er svona að velta því fyrir mér hvort ég eigi ekki að segja þessari pásu minni frá bloggskrifum lokið í bili og leyfa þessum fáu sem ennþá fylgjast með að fá smá fréttir af mér. Ég skellti mér örstutt í atvinnuleit eftir brúðkaupsferðina en ég virðist alltaf ætla út á markaðinn þegar allt er á niðurleið (sbr. lok 2001 þegar ég kláraði viðskiptafræðina). Þessi leit mín bar sem sagt engan árangur og hef ég því sagt skilið við hana að sinni. Ég er hins vegar komin á fullt í ritgerðarvinnu og stefni á að ljúka náminu um næsta sumar. Ég á eitt valfag eftir líka og hef ákveðið að taka kúrs sem heitir “Motivation i videnarbejde”. Hann byrjar núna í janúar og lýkur með ritgerðarskrifum í maí. Ég er mikið að velta fyrir mér hvernig ég eigi að tvinna ástandið hérna heima inn í ritgerðarefnið mitt en hef ekki ennþá fundið þá leið sem ég held að henti mér best. Það er bara mikið að gera í hausnum á mér núna, miklar pælingar en engar niðurstöður eins og er. Um leið og það er komið þá þarf að finna leiðbeinanda við CBS sem er tilbúinn til að vinna í þessu með mér í gegnum netið … og þegar það er búið, þá get ég loksins byrjað almenninlega!
Ég er að fara í sneiðmyndatöku nr 2 núna á fimmtudaginn. Fór í blóðprufur í síðustu viku og ætli ég fái svo ekki niðurstöður úr þessu öllusaman á þriðjudaginn í næstu viku. Mér líður ótrúlega vel, hef aldrei verið í betra formi og er bara almennt séð mjög hress þrátt fyrir allt krepputalið undanfarnar vikur.
Ég kem með fréttir þegar ég fæ niðurstöðurnar úr rannsóknunum eftir helgi …
Erla perla
October 24, 2008 - Posted by Erla Sylvía - 2 Comments
Ég á afmæli í dag! Komin á fertugsaldurinn kjeeeellingin og aldrei verið hressari.
Sendi sjálfri mér hér með hjartanlegar afmæliskveðjur … Þetta verður awesome dagur. True story.
August 25, 2008 - Posted by Erla Sylvía - 7 Comments
Jæja, þá er ég orðin FRÚ. Og svo er ég líka að verða ÞRÍTUG. Hvar ætli þetta endi eiginlega? Mér finnst ég sjá gráu hárin spretta fram í vöngunum og ég er ekki frá því að ný hrukka hafi bæst við í hópinn í gærmorgun. En það er kannski ekki skrítið miðað við hvernig ég brosti ALLAN laugardaginn … það var svo gaman
Já, brúðkaupsdagurinn OKKAR (ég var skömmuð fyrir að tala of mikið um þetta sem daginn MINN og brúðkaupið MITT … þó þetta hafi klárlega verið MINN dagur :-p) var yndislegur!!! Við erum alveg í skýjunum með þetta allt saman; athöfnina í kirkjunni, myndatökuna í Grasagarðinum (í skítakulda og rigningu nota bene) og svo sjálfa veisluna sem var ÆÐI ÆÐI ÆÐI. Þetta hefði ekki getað heppnast betur - maturinn var æði, skemmtiatriðin voru æði og veislustjórarnir voru æði. Svo sló Bogomil Font og bandið hans heldur betur í gegn, það var dansað og trallað og … drukkið
Við Jonni viljum þakka öllum sem komu (og þeim sem komu ekki) kærlega fyrir okkur!
Nú tekur raunveruleikinn við … og það er bara spurning hvað ég á eiginlega að fara að gera. Ég er svona hálfpartinn búin að draga það á langinn að taka ákvörðun um það … hvort ég eigi að fara að vinna eða hella mér út í lokaritgerðarskrif en held ég sé nokkurn veginn búin að ákveða mig. Mig langar til þess að fara að vinna og ætla því að reyna að finna mér starf við hæfi. Mig langar að kynnast nýju fólki, takast á við einhver spennandi verkefni og (aldrei þessu vant) hjálpa til við að fæða fjölskylduna. Ég er þó ekki tilbúin til þess að taka hvaða starfi sem er og ef ekkert gengur þá get ég alltaf gert þetta blessaða lokaverkefni
August 23, 2008 - Posted by Erla Sylvía - 4 Comments
… eða að minnsta kosti helgin sem enginn mun gleyma! Það er ekki talað um annað en íslenska handboltalandsliðið eftir frábæra frammistöðu þeirra á Ólympíuleikunum! Þeir eiga svo sannarlega hrós skilið!
Við erum náttúrulega að fara að gifta okkur á EFTIR!!! Trúi varla að stundin sé runnin upp, finnst eins og Jonni hafi beðið mín í gær … en þetta sannar bara enn og aftur hvað tíminn er allt of fljótur að líða. Það er næstum allt reddí, við Jonni erum að leggja lokahönd á myndashowið og bara að njóta morgunsins með Guðjóni Inga sem er orðinn frekar spenntur. Hann verður hringaberi og íklæddur smóking eins og pabbi sinn. Guðrún Dís (dóttir hennar Árnýjar vinkonu) ætlar að ganga með honum inn kirkjuna … hún er ögn stabílli en hann sonur okkur og verður honum til halds og trausts ef hann skyldi ákveða að hætta við. Þau stóðu sig reyndar eins og hetjur á æfingunni í gær svo ég hef nú ekki miklar áhyggjur. Athöfnin verður líka bara skemmtilegri ef þau gera einhver prakkarastrik
Vígslan fer fram í Háteigskirkju kl 16.30 og veislan verður í salnum þeirra strax á eftir. Við förum reyndar í myndatöku þarna á milli en kunningi hans Jonna ætlar að mynda okkur í bak og fyrir. Svo er flugeldasýning kl 23.00 okkur til heiðurs … hehe
Svo byrjum við fyrsta daginn okkar sem hjón á því að vakna snemma og horfa á handbolta … ekki alveg eins og mig dreymdi þetta þegar ég var lítil en ætli maður muni nokkuð gleyma þessu
ÁFRAM ÍSLAND!!!
August 6, 2008 - Posted by Erla Sylvía - 2 Comments
Jæja, nú eru 17 dagar þar til við Jonni göngum saman upp að altarinu og að ýmsu að huga áður en stundin rennur upp. Við Jonni skelltum okkur í kökusmakk áðan og mig verkjar enn í magann af öllum sykrinum og rjómanum … ég hef ekki verið mikið í þeim pakkanum síðustu mánuði og maginn á mér kominn úr öllu formi (þ.e. sætindaátsformi). Kakan var hins vegar ljómandi góð og ég hugsa að við látum þetta eina smakk nægja, af hverju að endasendast út um allan bæ ef fyrsta kakan er æði Mér bregður hins vegar alltaf jafnmikið þegar ég heyri verðið á öllu sem tengist þessu blessaða brúðkaupi … eins gott að við ætlum bara að gera þetta einu sinni! Annars erum við Jonni eiginlega of róleg yfir brúðkaupsundirbúningnum og ennþá er margt sem á eftir að gera. Stærstu hlutirnir eru, að ég held, nokkurn veginn græjaðir en svo eru það öll litlu smáatriðin sem skipta svo miklu máli. Fatnaður og greiðsla á þá sem taka þátt í kirkjunni, allar skreytingar, akstur, hótel, myndataka … og svona mætti lengi telja.
En hvað ég hlakka samt til
August 2, 2008 - Posted by Erla Sylvía - 2 Comments
Við Jonni höfum ákveðið að vera innipúkar þessa verslunarmannahelgina og nýta tímann til þess að græja og gera hérna heima. Við erum enn með nokkra kassa sem ekki er búið að taka upp úr og svo eigum við eftir að tæma bæði geymsluna hjá Elvu systur og tengdó. Við fengum nefnilega ekki geymsluna okkar afhenta um leið og íbúðina en samt eru nú komnar þó nokkuð margar vikur síðan við fengum hana … bara erfitt að finna tíma til þess að færa draslið (og að nenna því auðvitað). Vííííí … þetta verður sko stuð! Jonni ákvað reyndar að skella sér í smá vinnugleði í gærkvöld og fór svo að hjálpa Runa og Heiðrúnu í þeirra gleði. Þau fluttu loksins heim á mánudaginn var og fengu gáminn sinn í gær. Þau neyddust því til þess að gerast innipúkar líka enda mikið mál að flytja á milli landa með tvo litla gutta. Við erum svo boðin í gamaldags partý til Ásrúnar og Ástþórs í kvöld og ætlum auðvitað að kíkja þangað. Guðjón Ingi verður í næturpössun hjá ömmu Helgu (greyið Helga komin með fráhvarfseinkenni eftir Danmerkurdvölina okkar :)) því við komum því miður ekki miklu í verk hérna á heimilinu ef herra “mig-vantar-athygli” er á svæðinu. Við Guðjón Ingi erum annars búin að hafa það mjög náðugt þessa síðustu viku hans í sumarfríi. Hann er orðinn litasjúkur og vill fátt annað gera en að lita, teikna og mála. Ekki ólíkt mér á þessum aldri (og hvað þá pabba hans sem finnst nú ekki leiðinlegt að teikna :)) en ég verð nú aðeins að monta mig af drengnum fyrir ótrúlega hæfni miðað við aldur. Það fer varla út fyrir og ef það gerist þá liggur við gráti og meiriháttar fýlu því hann er (ólíkt okkur Jonna … eheh) með fullkomnunaráráttu á háu stigi.
Í þessum töluðu orðum eru þeir feðgar á leiðinni niður í bíl að sækja það sem við áttum í gámnum hjá Runa og Heiðrúnu. Þar sem að við vorum þarna úti þegar gámurinn kom þá fékk ég að lauma einum stórum matarkassa fullum af lífrænum heilsuvörum sem og einni IKEA hillu með í gáminn. Ég fékk nett áfall eftir að við fluttum heim og ég þurfti að kaupa heilsudótið mitt hérna. VERÐIÐ!!! En maður lætur sig nú samt hafa það þó það sé dýrt. Ég réttlæti þetta þannig að þar sem að við kaupum lítið sem ekkert af gosi, snakki, nammi, kökum, brauði, mjólkurvörum, kjöti og annarri óhollustu þá getum við leyft okkur að eyða peningnum í hollar og góðar (og helst íslenskar) lífrænar vörur. Aðgengi að lífrænum vörum hefur aðeins aukist hérna heima á síðustu árum og núna er til dæmis hægt að kaupa ýmsa hluti í næstu matvöruverslun. Þar er verðið yfirleitt aðeins skárra en í sérverslunum, eins og til dæmis í Yggdrasil eða Maður lifandi þar sem mann verkjar svakalega í veskið eftir hverja heimsókn. Ég er búin að vera svoldið dugleg að lesa mér til um samband mataræðis og heilsu (og þá sérstaklega krabbameins) og er sannfærð um að mataræði hafi þar gríðarleg áhrif. Það skýrir auðvitað ekki allt en ég er viss um að rétt mataræði geti hjálpað manni að berjast við sjúkdóma og í mörgum tilfellum megi koma í veg fyrir þá með því að borða hollt.
Mér líður mjög vel þessa stundina, bæði andlega og líkamlega. Ég skellti mér í ræktina í gær og prufaði nýja prógrammið sem ég var að fá frá einkaþjálfaranum mínum og ég get varla lyft upp höndunum eftir þessa geðveiki. Samt gaman að finna aðeins til og vita þannig að maður hafi tekið vel á því Ég fór og hitti lækninn minn á þriðjudaginn var og við ræddum stöðu mála. Ég er komin með blöðru á annan eggjastokkinn og það getur verið að það sé hún sem ég finni fyrir. Bæði læknarnir hérna heima og úti vilja meina að þetta sé venjuleg blaðra (svona eins og margar konur fá) en það er því miður ekki hægt að ganga úr skugga um það nema skera mig upp. Það er eiginlega lítið hægt að gera nema bara fylgjast með þessu og ég mun líklega fara næst í skoðun þegar sneiðmyndatakan verður endurtekin í nóvember. Þó svo að það kæmi í ljós að þetta væri slím þá væri ekkert gert í því að svo stöddu, heldur bara fylgst vel með. Ég er ekki mikið að spá í þessu núna, hef mikið annað að hugsa um og svo er líka lítið upp úr því að hafa að vera stöðugt að velta sér upp úr einhverju sem maður ræður lítið við. Ég geri það sem ég get til að hjálpa með því að rækta líkama og sál og svo verður hitt bara að hafa sinn gang. Ég vona að þau ykkar sem lesa þetta og standa mér næst geti gert það líka, þ.e. ekki vera að velta ykkur upp úr þessu og reyna að einblína frekar á allt þetta góða í lífinu
GÓÐA HELGI ÖLLSÖMUL!!!
July 27, 2008 - Posted by Jonathan Gerlach - 3 Comments
… og þess vegna ákváðum við Jonni að fresta fyrirhugaðri heimkomu á þriðjudaginn var fram til dagsins í dag og ná þannig nokkrum góðum sólardögum hérna í landi bauna. Það hefur reyndar verið alveg ágætt veður frá því við komum en ekki mikið meira en það - okkur langaði í SÓL og HITA! Við yfirgáfum nú samt SOLbakken á réttum tíma og færðum okkur yfir til Ladda og Þórunnar úti á Amager en þau voru svo sæt og góð að lána okkur íbúðina þar sem þau eru á Íslandi. Þar erum við búin að hafa það náðugt og í leiðinni gefa Runa og Heiðrúnu smá “breik” frá okkur. Um að gera að leyfa þeim að njóta síðustu daganna hérna í Köben í faðmi Solbakken-familíunnar þar sem við verðum mjög líklega MJÖG tíðir gestir hjá þeim þegar á klakann er komið. Við erum annars búin að hafa það mjög gott - Ásrún, Ástþór og Guðmundur Bragi fóru með mér og Guðjóni Inga út þann 8. júlí og svo kom Jonni hingað þann 10. júlí. Á meðan þau voru hérna þá fórum við í Bakken og í dýragarðinn og skemmtum okkur konunglega þar. Við litla familían erum svo búin að heimsækja dönsku ættingjana, þ.e. bæði Anette og Jens (föðursystur Jonna og mann hennar) og svo pabba hans Jonna og Bettinna, konu hans. Mestur tími hefur þó farið í afslöppun, pökkun og pössun á litlum ormum sem eru þó orðnir ansi sjálfbjarga. Gámurinn kom á mánudaginn var, og var hann fylltur í einum grænum, ekki mikið mál með góðra manna hjálp. Veðrið síðustu daga er búið að vera dásamlegt, eiginlega of mikill hiti en ég ætla þó ekki að kvarta yfir því sem ég er búin að bíða svo eftir Við skelltum okkur á ströndina í fyrradag og í gær fórum við öllsömul í Frederiksberg have og sleiktum sólina þar (og skuggann reyndar, það var svo heitt). Í gærkvöldi var svo kveðjupartý á Solbakken fyrir Runa og Heiðrúnu og við sátum úti og sungum langt fram eftir nóttu.
Við eigum flugum kl 23.00 á dönskum tíma og eigum því að lenda á miðnætti heima á Íslandi. Þó svo að maður nenni engan veginn að pakka og standa í þessu flugvallar og -vélar veseni, þá verður nú ansi gott að komast heim í eigið rúm og ferskt og gott loft. Guðjón Inga er líka farið að langa heim, er búinn að spyrja um það núna nokkrum sinnum hvort við förum ekki bráðum heim til Íslands í húsið okkar …
Svo ég minnist nú aðeins á mig og mína heilsu, þá er hún mjög góð þessa stundina og búin að vera það undanfarið. Ég fékk niðurstöður úr blóðrannsókninni um daginn og komu þær allar mjög vel út. Fyrir þá sem eitthvað vit hafa á þessu þá voru gildin hjá mér: CEA 1,0; CA-125 11,6 og CA-19.9 14,0 og er þessar tölur allar langt undir viðmiðunarmörkum. Ég er þó ekki búin að láta lesa úr sneiðmyndatökunni þar sem bæði læknirinn minn og ég höfum verið í fríi en ég á tíma hjá honum í næstu viku og mun skella niðurstöðunum á netið um leið og þær koma. Þó svo að blóðprufurnar hafi verið góðar þá hef ég á tilfinningunni að þetta sé ekki alveg 100% … ég er ennþá mjög bólgin á maganum og finnst eiginlega eins og það hafi versnað síðustu vikur. Þetta er farið að minna of mikið á bólguna sem ég var með áður en ég fór í fyrstu aðgerðina og gæti því þýtt að það séu komnar nýjar blöðrur á eggjastokkana. Ég er þó alls ekki í neinu svartsýnisskapi og mér líður mjög vel … meira svona raunsæisskapi þar sem það er augljóslega ekki allt eins og það á að vera.
Ég kveð að sinni …
Erla perla
